Kuoddâlemravvuuh
Tun puávtáh kuoddâliđ ovdâskode riehtiäššiulmui, jis epidah, et virgeomâhâš, virgeolmooš tâi almos pargo tipšoo priivaat tááhu ij lah nuávdittâm laavâ tâi tiävdám kenigâsvuođâidis tâi jis epidah, et vuáđu- já olmoošvuoigâdvuođah iä lah toi tooimâst olášum ääšimiäldásávt.
Ovdil kuoddâlem kannat maaŋgâ tábáhtusâst väldiđ ohtâvuođâ njuolgist ton virgeomâhâžân, kote lii tuu mielâst toimâm laavâvuástásávt. Čuolmâ sáttá čovdâšuđ jotelávt jo toin naalijn.
Riehtiäššiolmooš ij tuuđhâ
- aašijd, moh láá koskân virgeomâháást, peic jis koččâmuš lii ovdâmerkkân ääši kieđâvuššâm ááijánmist tâi virgeulmuu lattiimist
- kuoddâlmijd, moh kyeskih paijeel kyehti ive puárásubboid aššijd, peic jis toos lii eromâš suijâ
Kuoddâliđ puáhtá ohtuu tâi oovtâst iärásijguin. Kuoddâliđ puáhtá meiddei nube ulmuu peeleest. Nube ulmuu ääšist kuoddâlmân onnum väldikirje.
Nomâttes kuoddâlmeh kirjejuvvojeh, mut toh iä tutkuu.
Kuoddâlem tutkâm lii mávsuttem.
Kuoddâliđ puáhtá laavâvuástásii monâttâlmist, ovdâmerkkân:
- toimâvääldi paijeelmoonnâm tâi kuorâttâllâmvääldi puástukevttim
- ääji ääši kieđâvušmist, miärádâs vájugâš vuáđustâllâm, huolâmettumvuotâ, ravvim váilum, äšittes lattim tâi mottoom eres šiev haldâšem vuástásâš monâttâllâm
- vuáđu- já olmoošvuoigâdvuođâi luávkkám
Virgeomâhááh láá ovdâmerkkân:
- staatâ virgáduvah já lájádâsah
- pyereestvaijeemkuávluh
- kieldâi virgáduvah já luáttámušorgaaneh
- tuámustoovlih
Virgeulmuuh láá ovdâmerkkân:
- pooliseh
- olgospeerrâmulmuuh
- sosialpargeeh
- tiervâsvuotâkuávdáštuáhtáreh
- kieldâhoovdah
- vuáđuškoovlâ máttáátteijeeh
- huksimtärhisteijeeh
- tuámáreh
Tun puávtáh kuoddâliđ riehtiäššiulmui meid lájádâsâin, moh tipšoh almos pargoid. Toh láá ovdâmerkkân pargottesvuotâkasah já táhádâslájádâsah. Toh mäksih ulmuid sajanmáávsuid, torjuid já iäláttâsâid. Almos pargoid tipšoh meid irâttâsah, main pyereestvaijeemkuávluh uástih palvâlusâid. Ovdâmerkkân párnáipäikki puáhtá leđe tággáár irâttâs.
Riehtiäššiulmuu kocceem vuálá iä kuulâ:
- ovdâskodde lahâasâtteijen, aalmugovdâsteijeeh
- staatârääđi riehtikansler
- olgoeennâm virgeomâhááh
- aalmugijkoskâsiih ornijduvah
- jurduuliih ovtâstusah
- paaŋkih já eres irâttâsah, jis toh iä tipšo almos pargoid
- visteuásusfinnoduvah
- priivaat áámmáthárjutteijeeh, tego äššivyeijeeh tâi priivaattuáhtáreh
- ovtâskâs ulmuuh
Kuoddâlâm-uv mun riehtiäššiulmui vâi riehtikanslerân?
Kuoddâliđ puáhtá vuáđujurdust jo-uv riehtiäššiulmui tâi riehtikanslerân. Sunnuu pargojuávust láá kuittâg merhâšittee iäruh, moh vaigutteh toos, kuábáš loppâloopâst totká kuoddâlem.
Kuoddâliđ kannat njuolgist ton lavâlâšvuotâkoccei, moos äšši pargoi jyehimist adelum laavâ mield kulá. Jis návt ij lah tábáhtum, te riehtiäššiolmooš tâi riehtikansler sirdá ääši olmâ lavâlâšvuotâkoccei.
Riehtiäššiolmooš já riehtikansler pyehtiv sirdeđ kuoddâlmijd kyeimi kuáimásis mudoi-uv talle, jis sirdem jođálmit ääši kieđâvuššâm tâi lii mudoi vuáđustâllum. Jis kuoddâlem sirdoo nuubán tutkâmnáál, te sirdemist puátá ain almottâs kuoddâleijei.
Äššikirjeh láá almoliih
Kuoddâlemäššikirjeh láá táválávt almoliih. Laavâ mield kalga kuittâg toollâđ syeligâsâst ovdâmerkkân kuoddâleijee tiervâsvuotâtilán tâi sosialhiäđoid kyeskee tiäđuid.
Kieđâvuššâmäigiulme enâmustáá ohtâ ihe
Viggâmuš kuoddâlemaašij kieđâvuššâmäigin lii enâmustáá ohtâ ihe. Jis kuoddâlem ij laiđii eidusii tutkâmân, te vástádâs kuoddâlmân adeluvvoo táválávt kuulmâ mánuppaje siste.
Kost mun finniim lasetiäđuid?
Kuoddâlmist puáhtá savâstâllâđ muuneeld riehtiäššiulmuu kanslia virgeulmuiguin. Sijjân finnee ohtâvuođâ ovdâskode puhelinkuávdáá peht p 09 4321. Persovnlâš teivâm váátá ääigi väridem.
Kanslia virgeulmuuh iä pyevti munedistiđ kuoddâlem lopâlii puáttus. Kuoddâlem tutkâm álgá eskin, ko kirjálâš kuoddâlem lii pieijum joton. Kuoddâlmist taha miärádâs riehtiäššiolmooš tâi išeriehtiäššiolmooš.